今晚有五場草、沙地賽事上演，參賽馬數量未算太多，形勢平均選馬宜小心推敲。小妹今日揀咗林宏基馬房嘅三匹參戰馬畀大家參考，希望可以順利過關。
第一場四、五班千二米，「一代天驕」呢匹三歲馬台型吸引，去季及今季初在同程均以輕鬆姿態贏馬，短途實力毋庸置疑。上仗再出被捧成一面倒熱門，可惜起步未幾受對手擠壓墮至較預期更後位置，最後只能跑回一席第七，表現令人失望。復課重新調教，試跑走勢急勁，狀態不俗。今日續由高君濤策騎必思進取，出爭首本路程必拼無疑，捲土重來不妨追捧多次。
第二場四、五班千二米，「盛通之光」五歲馬短途實力有根據，上季在同程取得兩勝，表現清脆俐落。今季轉投林宏基馬房後操練方式不同，季初在同程不敵廄侶得第二，走勢令人驚喜，但可惜之後幾仗演出未如理想。今日操好再上征途，落班角逐形勢不同，初配日將田中正一立勝在戰意十足，面對一群實力不強對手，跟前鬥後可望突圍而出，半冷門不妨贏位兼投捧場。
第三場二班一〇五〇米，「冬甩仔」呢匹沙地短途良駒今季兩度報名上陣，可惜因參賽馬數量不足而取消，令其未能一展所長。晨課操練工夫積極，試跑走勢勁如炮彈，狀態大勇。今晚出爭首本路程擺明車馬，配合馬房今晚攻勢，呢匹招牌馬一定盡拼，續由老拍檔張志立操刀駕輕就熟，對手實力不算強，可望贏馬打開今季勝利之門，可放心追捧。