(醫道堂)低血壓小資訊

471

「Hello,大家好!我係Dr.Adam」(心臟內科醫生)

  Adam:一般講到血壓,大家都會諗到「高血壓」。其實呢,唔少人都有「低血壓」問題架!

  Adam:血壓係指血液透過心臟嘅收縮送出,所產生嘅力道。如果力道太細,就表示血液無辦法好順暢咁送到去全身,而血液裏含有養分同氧氣,必須供給全身細胞使用,所以係十分重要。

  Adam:一般來講,低血壓嘅定義是收縮壓低於90mmHg,而舒張壓低於60mmHg。但是一般人可能唔會去注意自己嘅血壓,甚至根本無量血壓嘅習慣。所以大家可以留意下自己或者身邊嘅人有無以下症狀:

  1.容易頭暈,嚴重甚至會暈倒

  2.眼花,視線模糊

  3.經常覺得不明原因嘅疲勞

  4.注意力不集中

  5.手腳冰冷或身體寒冷

  6.氣喘,呼吸快而且淺

  7.脫水

  低血壓成因

  1.久坐或久站:長期久坐或久站,都會導致下肢循環唔好、靜脈回流較差。

  因此回流到心臟嘅血液量變少,心臟輸出嘅血液量都會跟住減少,容易引發低血壓。

  2.運動量不足:下肢肌肉嘅收縮,可以令靜脈嘅血液回流。所以呢,運動量唔夠、肌肉不足,都會導致血液循環唔好。血液回流量變少,進而影響到心臟輸出血液,血壓就無法升高。

  3.大量失血或脫水:運動後無適時補充水分,導致體內水分變少,血壓都會跟住降低。如果成日有脫水嘅情況,就記得睇醫生檢查下啦!

  另外,好似一啲外傷大量失血或者女性經期,也會導致血壓降低。

  4.營養不良:肚餓太耐、為咗減肥而過度節食,呢啲都會引起低血壓。因為養分唔夠,而導致體內嘅血紅素製造不足,血液嘅帶氧量唔夠,自然就會頭暈,影響健康。

  5.姿勢性低血壓:咩叫姿勢性低血壓呢?成日聽到人講「踎低起身見頭暈」就係咁解啦!

  踎低然後突然起身,血液大量往下流動,就會出現頭暈嘅感覺,嚴重嘅甚至可能暈低。所以大家切記留意,無論係踎低要起身、瞓低要起身嘅時候,都要放慢速度,畀啲時間身體去調節血壓。

  6.心臟功能不健全:呢個屬於先天性構造問題,要請專科醫師評估處理方式,通常都係以藥物或是手術去治療。

  7.內分泌、代謝失常:有關代謝功能嘅甲狀腺、腎上腺、賀爾蒙及內分泌系統,如果出現異常都有可能會引起低血壓。

  8.服用降低血壓藥物:長期服用降血壓藥嘅人,普遍來說血壓通常會比較低,同時都要注意會容易引起「姿勢性低血壓」。

  想要拉高血壓,可以點做?

  1.運動是最好的改善方法:下肢可以話係人嘅第二個心臟,維持足夠嘅肌肉量係十分重要,肌肉要透過訓練先可以增加。

  另外,日常保養透過保持規律嘅運動習慣,促進血液循環。例如每日健走6000步、慢跑等等。適度的運動,能紓緩壓力讓人變快樂,進而幫助睡眠品質變好,讓作息更正常,也是讓血壓正常的好方法。

  2.不妨食鹹啲、食肥啲:血壓低而且太瘦嘅人(例如BMI小於18.5)可以吃胖一點,達到理想體重來升高血壓。

  另外,血壓低嘅人可以食鹹少少都無妨。市售的「低鈉鹽」是以鉀取代部分鈉,而鉀係有輕微降血壓嘅作用,因此,血壓本來偏低嘅人係唔適合用這種鹽調味。

  3.飲多啲水:尤其夏天流汗容易流失水分,加上天氣熱,血管擴張,血壓本來就會低啲,如果體內水分再唔夠嘅時候,血壓就會降得更低,所以平時要攝取充足嘅水分,避免脫水。

  4.適量地攝取咖啡因:咖啡因能夠使血壓突然升高,所以醫生會提醒高血壓病人必須限制咖啡因嘅攝取量。相反地,低血壓嘅人就能夠藉由喝茶、咖啡將血壓拉返高啲。

  最後,如果係因為服用藥物而導致嘅低血壓,請一定要向你嘅醫生反應情況,透過藥物調整,避免長期處於低血壓嘅狀況啦!

  如果甚麼醫療資訊想了解更多嘅就留言話畀我哋知啦!

  我哋下次見啦!拜拜∼

  梁文健醫生心臟內科院士讀者如有問題可電郵至Adamkin1216@yahoo.com.hk