昨施政總結記者會尾聲，傳媒問及賀一誠過去5年任期有何最深體會？賀一誠回應時感嘆「邊一個可以做到5年施政，有3年打仗疫情？呢個就係最深嘅體會！」他又憶述6月曾接受一批傳媒集體訪問時被問到同一問題，他當時回答「我好攰」，賀一誠說，「事實我當時已經係好攰，所以我知道身體有問題，我用呢句話（我好攰）嚟結束當日嘅訪問」。
談及任期結束、身體好轉後，會否繼續用其他身份服務澳門、服務國家？賀一誠說，經過5個月，最近身體已恢復得很好，「大家睇到啦，今時今日講嘢都比較好嘅中氣，嗰段時間（建軍節）連中氣都唔夠，而家我恢復得好好！」他直言，作為生於澳門、長於澳門的人，不論甚麼身份，都會為澳門的發展貢獻自己的力量，在有需要的時候，他一定會做好這方面的工作，「我哋咁多年培養出嚟嘅個人責任感，為咗澳門嘅發展，我哋一定會拼足全力！」
身體狀況不尋求連任無其他原因
記者會上，傳媒亦先後問到賀一誠不尋求連任的原因。他重申不連任是身體原因，沒有其他考慮，他笑言：「大家可以見到我清減咗，呢個都係身體嘅原因，我年紀都唔輕啦，應該要讓畀我後生嘅人，去繼續為澳門進行有關工作！」賀一誠感觸道：「做呢個位（行政長官）壓力係好大，特別係3年疫情入面，我哋成批司長同我都習慣咗每晚瞓3、4個鐘，係好傷身，身體會搞垮咗」，他坦言與羅立文司長年紀大，近年睡眠仍未恢復正常，故不連任沒有考慮其他原因。
賀一誠又補充指，今年1月新春行花市後，很多傳媒問他是否連任，他一直都沒有表態，「因為身體係自己知道，佢（身體）已經有signal（信號）畀咗你，就要去做保健工作，條命係自己嘅，我都希望可以睇到澳門更加成功嘅未來！」
至於有葡文媒體問及賀一誠此次可能是最後1次出席公開記招，個人感覺如何？他笑稱：「我今日唔可以話係最後1個記者招待會，唔可以講死，因為我重有1個月先離開呢個職務，可能突然之間有咩發生，我都重要同大家見面，所以我可以講今日同大家唔再講嘢啦，大型活動嚟到嗰時，大家都係會可能採訪我等等。」本報記者