鮑李組合又見冬祝開齋

292

  今日有六場沙地賽事上演,上陣馬數量尚算踴躍,形勢平均選馬宜小心推敲,小妹今日睇好三匹沙地表現有根據嘅馬匹,希望可以交出好表現,啱心水可以跟進。

  第一場特別條件賽一五一〇米,「又見冬祝」呢匹七歲馬跑沙地係唯一出路,上季轉投李森馬房後表現更趨穩定,跑法方面較以往更主動,令不少馬迷對其另眼相看。晨課積極備戰,彈閘走勢前慢後快,狀態甚勇。今日仍由最佳拍檔鮑羅素操刀,戰意唔使懷疑,騎練季內未贏馬一定盡拼,出戰首本路程決心打硬仗,對手實力唔算強,值得贏位兼投。

  第二場四班一三五〇米,「大魔頭」呢匹質新馬沙地性能有根據,上季在沙地短途五戰取得三勝兩位,表現出色。上仗季內初出角逐同程,臨場捧場票數硬淨,反映幕後信心十足。可惜馬匹在陣上際遇欠佳,轉入最後直路不久曾受阻,鞍上人又要轉換跑線,連番影響下結果跑第四,證明呢個路程合其發揮。今日操足捲土重來,馬房唔服氣再報同程,可見決心甚大,余健雄壓陣人馬合拍,值得追捧多次。

  第三場二班一五一〇米,「大魔王」五歲馬場地性能廣泛,上季衝擊多場四歲馬賽事失敗,到季尾休息回氣復出,即在沙地中距離贏馬,狀態全面回勇。晨課操練認真,試閘走勢輕描淡寫,狀態大勇。今仗再戰贏馬路程,負磅較上次多四磅,形勢仍然有利,張志立執韁人馬夠合拍,對手實力與上次相若,交回水準可望取得跨季孖寶,值得捧場。