高君濤航海之王開齋

194

  今晚有六場沙地賽事上演,形勢唔算太複雜,希望有利熱門馬發揮。小妹賽前做好功課,今日揀選三匹心水畀大家參考,各位啱心水可跟進。

  第三場四、五班一〇五〇米,「多樂飛星」呢匹新馬成熟程度唔差,上季初出已有心搏殺,不過遇上對手表現更突出,最後祇能屈居亞軍。休後重新備戰,試跑走勢有進步,狀態甚勇。今晚角逐四五班混合賽形勢佔優,何華麟落足心機在呢匹馬身上,梗係希望可以贏馬得到回報,對手實力平平,贏面的確好高,值得追捧。

  第四場三、四班一〇五〇米,「航海之王」呢匹沙地短途新貴實力不簡單,上星期在騎師何華麟胯下一放到底,贏馬過程未受考驗。今日打鐵趁熱匆匆再上陣,重配高君濤戰鬥力並未減弱,排三檔起步角逐首本路程,騎者可望憑此駒贏馬打破悶局,賠率熱辣辣亦要捧場,可放心支持。

  第六場二、三班一三五〇米,「非同凡響」四歲馬沙地性能優越,上季在同程三戰三捷未逢敵手,實力有幾多尚未有答案。晨課備戰功夫積極,試跑走勢夠勁,狀態大勇。今仗初配巴西好手馬雅,戰鬥力有增無減,排中檔起步且負磅不重,起步跟前可望再一次大勝對手,尾場賽事頭馬非佢莫屬。