高君濤神獸在手掘「金」

1285

  今日有六場草、沙地黃昏賽事上演,參賽馬數量尚算踴躍,小妹今日揀咗騎師高君濤三匹座騎俾大家參考,啱心水可玩吓過關。

  第二場五、六班千五米,「婦好將軍」呢匹三歲馬雖然體型單薄,不過陣上表現唔算太差。上仗初配高君濤決心出擊,結果全程採取主動跑法,愈放愈順下贏馬開齋,表現猶有餘勁。晨課備戰工夫正常,狀態大勇。今日返回中距離角逐,腳法合適,原裝配搭再來必拼無疑,信賴馬房鬥志,且放且留可望再下一城,值得捧場。

  第五場二班一〇五〇米,「佳運金」場地性能甚廣,上季在草地賽事取得四連勝,表現無懈可擊。今季馬房安排呢匹馬向沙地發展,季初即在沙地一三五〇米贏馬,而上仗更在短途一放到底贏馬,表現同樣出色。晨課操練工夫認真,試跑走勢順暢,狀態勇銳。今日繼續由高君濤執韁,原班再戰負磅較上次多六磅,形勢唔算吃虧,馬房鬥志高昂,再報贏馬路程有捨難取易之感,對手多是其蹄下敗將,交回上仗水準,可望再勝一仗,不妨重視。

  第六場三班一三五〇米,「江河神獸」呢匹質新分子沙地性能突出,來澳初期陣上經常一口氣快放,以致末段力度減弱。最近兩仗此駒口勁收歛,採取留前鬥後跑法表現更理想,上仗同程大勝對手而回,姿態從容。晨課操練工夫認真,埋門試閘走勢力掩鋒芒,狀態突出。今日雖然升班角逐,不過對手實力唔算太強,祇要留守有利位置,可望在最後直路突圍而出,高君濤執韁,人馬合拍,有力爭取三連勝,尾場賽事可作為捧場重心。