賀廄神童聯盟攻堅

1564

  今日有六場草地黃昏賽事舉行,戲碼精彩屬全季戲肉所在,不過場地實際情況如何,臨場宜留意。小妹今日揀咗三匹狀態較勇既參賽馬俾大家參考,啱心水可玩吓過關。

  第一場四、五班千五米,「聯安神童」呢匹四歲馬今季進度理想,季初在同程贏馬表現清脆俐落,到季中減夠分後再下一城,可見其中距離威力不弱。上仗負重磅追回一席第二,末段走勢惹人好感。今日再來角逐四、五班賽事負磅減輕,續由中野省吾策騎夠合拍,場地快慢對呢匹馬影響唔會太大,乘勇態未回落一定拼盡,不妨贏位兼投。

  第二場二、三班千八米,「正義聯盟」呢匹馬今季易主及更改馬名後運氣轉佳,季內在中距離路程上演出神勇,上仗埋門只以短距離屈居對手蹄下得亞軍,未能取得三連勝十分可惜。復課操練工夫未有放緩,狀態方面仍處於巔峰。今日轉戰長途腳法其實亦有根據,加上場地未必可以完全回復乾快,對呢匹擅跑軟慢既戰駒來說會有幫助,張志立壓陣人馬夠合拍,留放得好有力在末段殺出重圍,值得追捧。

  第六場四班千二米,「多臣」質新分子仍有不少進步空間,自從由高君濤接手策騎後,四戰取得一冠兩亞一殿佳績,可見人馬表現合拍。上仗同程被廄侶放離得第二,表現保持水準。復課操練認真,狀態仍勇。今日原裝配搭再上征途,出爭首本路程擺明車馬,排三檔起步形勢有利,起步順利可望擊敗對手,尾場賽事可放心作為捧場重心。