艷陽天不容再失

811

   今日有六場草地賽事舉行,屬上周日取消賽事的戲碼,場地狀況最難估計,臨場真係要執生。小妹今日揀咗譚文就馬房三匹參戰馬畀大家參考,啱心水可跟進。

   第一場五、六班千五米,「好友福」呢匹三歲馬台型吸引,前仗在草地短途後上得第五,末段追回甚多失地。上仗轉戰沙地,結果同樣交出好表現,雖然不入三甲,但表現甚具威脅。今日返回草地角逐,初戰中距離估計必合腳法,原配冼文諾搏殺,現改由查維斯執韁亦影響不大,對手實力非強,可望贏馬開齋,值得捧場。

  第三場四歲馬千五米,「大合金」呢匹四歲馬今季演出準繩,上仗表現失準,賽後原來發現蹄鐵鬆脫,落敗情有可原。復課積極操練,試閘走勢順暢,狀態具作戰水準。今日出爭打吡預賽,戰意唔使懷疑,高君濤執韁人馬合拍,返回中距離腳法亦合發揮,不妨贏位兼投。

   第五場二班千二米,「艷陽天」質新馬前速銳利,季內取得五連捷佳績後,近仗表現稍為回落,相信與場地較重兼對手實力較強有關。晨課積極操練,試跑火氣十足,狀態甚佳。今日出爭首本途程,原配冼文諾出擊,但騎者已轉赴外地策騎,高君濤有機會再策騎此駒,一定搏盡以取回日後帥權,排檔理想不妨追多一次。