今日有五場草、沙地賽事上演，參賽馬數量唔算太多，形勢平均選馬宜冷熱兼顧。小妹今日揀三匹近況甚勇嘅參賽馬畀大家參考，希望可以順利過關。
第一場六班千五米，「如意威威」六歲馬體型單薄，本身體重長期不足一千磅，不過陣上表現卻算穩定。上仗角逐千八米配上榜首騎師高君濤出擊，結果埋門一步力壓對手贏馬，騎者出色發揮成為贏馬關鍵。復課準備工夫未有放緩，馬匹試跑走勢悅目，狀態大勇。今日返回中距離上陣腳法有根據，原裝配搭再來求添食意圖，跟前鬥後可望再贏一仗，寶尾唔怕再追。
第二場六班千五米，「聯安百勝」呢匹四歲馬擅長角逐中距離，今季上陣五次，取得三亞兩季驕人成績，不過始終未能取得勝仗。上仗在變化地上被對手放離追入一席第二，末段衝刺凌厲。復課積極打磨，狀態有進。今日出爭首本路程擺明車馬，續由日將田中正一策騎人馬合拍，場地回復正常有助發揮，可望勝回一仗交代，值得贏位兼投。
第三場二、三班一五一〇米，「馬主聯盟」呢匹四歲馬陣上演出穩定，且本身場地適應力甚強。上仗出爭草地短途明顯路短不合腳法，但馬匹在末段一衝即追回一席第三，表現出色。晨課重新調教，試跑走勢急勁，狀態突出。今日返回沙地中距離上陣腳法合適，續由見習騎師特蘇日策騎人馬合拍，留放得宜可望取得今季第二場勝仗，可放心捧場。