浩勝系馬配恩利克無敵

1088

  今日有六場草地賽事上演,參賽馬數量唔算多,形勢平均選馬宜謹慎,小妹今日睇好恩利克嘅參戰馬,介紹三匹畀大家參考,希望可以順利過關。

  第一場特別條件千五米,「無敵施翰」呢匹七歲馬作戰經驗夠晒豐富,不過來到本地上陣就未曾交出頭馬,而且經常起步緩慢,影響陣上表現。上仗角逐千二米略為嫌短,未有好表現不足為據。復課積極操練,狀態不俗。今日角逐特別條件賽形勢唔吃虧,恩利克唔放手一定有計,祇要起步順順利利,以其目前評分可望交出好表現,不妨贏位兼投。

  第三場二班千八米,「浩勝皇星」中長途實力分子,上季曾經在打吡大賽中跑入第三,實力唔使懷疑。今季馬匹成熟程度更理想,開季後三戰取得兩勝一位佳績,表現穩定。晨課備戰工夫積極,試閘走勢力度十足,狀態甚勇。今日重返草地長途角逐腳法正宗,重配恩利克人馬夠合拍,留放得宜可望取得季內第三場勝仗,值得重視。

  第四場三、四班千二米,「浩勝駿逸」呢匹質新馬來澳前上陣次數不少,在短途賽事取得不俗成績,故此幕後對呢匹馬相當重視。此駒在本地上陣五次,取得三次殿軍,需要學習的地方仍有不少,但預期現時評分肯定有反彈空間。今日操足再上陣,角逐短途腳法合適,排二檔起步對呢匹質新馬發揮有幫助,試準而來鬥志唔使懷疑,半冷門值得一敲。