林凱座騎平地一聲「雷」

112

  今日有六場草、沙地賽事舉行,形勢絕對唔簡單,小妹今日揀選華將林凱三匹座騎畀大家參考,各位啱心水可跟進。

  第二場三四班千五米,「春雷」呢匹馬上季尾陣上演出已見有睇頭,在同程跑過一次第三及第四,表現漸入佳境。晨課落力備戰,試閘走勢洶湧,狀態已及水準。今日選擇有根據的路程上陣,馬房部署目標明確,交由林凱操刀戰鬥力增強,排三檔起步可靈活應對,均勢場合不妨贏位兼投。

  第五場六班一三五〇米,「玫瑰之寶」呢匹馬沙地性能優越,上季在沙地取得兩勝兩位,表現絕對唔差。新季復課操練功夫認真,試跑走勢順暢,狀態出色。今日出戰沙地合適路程,馬房未開齋一定搏盡,林凱與呢匹馬相當合拍,且戰且走面對一群實力唔算太強對手,可望贏馬交代,可放心支持。

  第六場四班一〇五〇米,「御彩」質新實力未見底,上季在沙地同程跑第二,表現水準不弱。復課操練積極,試閘走勢急勁有力,狀態具作戰水準。今仗安排在沙地短途上陣,馬房部署明刀明槍,林凱與此系馬合作愉快,鬥志唔使懷疑,排外檔一早望空更有利搶放,尾場賽事混戰局面,半冷值得一搏。