馮耀正今晚大「軍」壓境

561

  今晚有六場沙地賽事舉行,上陣馬數量唔少,小妹今日揀咗三匹馮耀正馬房嘅參戰馬畀大家參考,啱心水可玩吓過關。

  第二場四班一〇五〇米,「軍事紅人」場地適應力強,季內暫上陣十二次,結果取得三冠四亞兩殿佳績,表現穩定可靠。上仗力壓廄侶贏馬,復課操練冇偷懶,狀態突出。今仗雖然要負重磅與對手硬拼,不過呢隻馬季內兩度負相同磅位亦跑入亞軍,可見影響唔算好大,高君濤重掌帥印,戰意唔使懷疑,寶尾唔怕再追。

  第三場二、三班一五一〇米,「軍事潮人」呢匹五歲馬幕後認定係沙地性能最好,所以來澳兩季馬房祇安排其在沙地角逐。季內在同程取得兩冠兩亞佳績,表現有根據。今晚重配上季合作取得兩勝一位的何華麟策騎,合拍程度可信任,馬房爭冠路上可拼必拼,今仗負磅唔算重,跟前鬥後可望取得佳績,可放心支持。

  第五場五、六班一〇五〇米,「十小精靈」呢匹四歲馬多跑下進步不少,上仗報跑稍長路程,結果輸九個多馬位得第四,效果唔係太理想。復課操練正常,彈閘走勢順暢,狀態不弱。今晚返回季內三度入位的短途角逐,發揮應更合適,交由何華麟策騎決心不少,對手實力唔係太強,可望替馬房贏馬而回,值得捧場。