珍惜無限檔靚摘「冠」

345

  今日係一九年首次賽事,小妹祝各位馬迷新年快樂、身體健康。今有六場草地賽事戲碼精彩,小妹揀選三匹內檔馬畀大家參考,可用嚟玩吓過關。

  第一場四、五班千二米,「珍惜無限」呢匹馬前速夠快,來澳後以同程表現最突出,上仗不敵強手得第三,表現保持水準。晨課積極備戰,狀態不俗。今日等到首本路程才報名參賽,戰意唔使懷疑,高君濤壓陣人馬合拍,排一檔起步可謂如虎添翼,順利放出可望先食頭糊,值得捧場。

  第二場四班千五米,「金財子」呢匹馬場地性能廣泛,沙、草地在季內亦曾贏馬,表現不俗。上仗在同程後上不及得第四,末段追回不少失地。今日匆匆再上征途,仍由何華麟執韁人馬合拍,對手實力唔算強,跟前鬥後可望交回好表現,不妨追捧多次。

  第五場四、五班千二米,「冠軍駒」短途實力有根據,今季上陣四次,表現雖然唔算突出,不過落敗亦所負不遠。晨課操練認真,試跑走勢急勁,狀態甚佳。今日出爭首本路程,續由見習騎師操刀負磅甚輕,排二檔起步形勢佔優,跟前鬥後可望在最後直路殺出重圍,可放心支持。