曾寶珠提供

301

  今晚有六場沙地賽事舉行,上陣馬數量較少,小妹今晚揀選三匹水畀大家參考,可用嚟玩吓過關。

  第二場四、五班一0五0米,「賞適」呢匹四歲馬上陣次數唔多,上季跑過一仗,今季初出在同程快放得第二,負於強手蹄下不足為據。復課積極打磨,試跑走勢夠勁,狀態甚勇。今晚繼續用林凱操刀,遇上對手實力非強,正係贏馬補中黃金機會,賠率熱辣辣唔緊要,最重要係穩陣贏馬,值得捧場。

  第三場二班一五一0米,「金槍皇」沙地性能優越,今季三戰沙地取得兩冠一亞,表現愈戰愈勇。復課操練依然積極,馬匹狀態甚勇。今晚續由老拍檔余健雄執韁,人馬合拍鬥志十足,同程賽績穩定,跟前鬥後有力再取好成績,錦標當前可放心支持。

  第五場三、四班一五一0米,「銀寶貝」呢匹六歲馬沙地適應力較佳,上季在同程輕鬆贏馬開齋,反映實力不簡單。上仗季內初出角逐短途作熱身,結果後上得第六所負不遠。今晚返回贏馬路程角逐,重召何華麟可見幕後擺明車馬,上陣馬不多場合,留放上應更彈性,試準再來可望贏馬交代,值得追捧。