捧馬雅三駒創「輝煌」

221

  今晚有六場沙地賽事舉行,形勢較平均,小妹今晚睇好馬雅座騎,揀選三匹畀大家參考,希望可以順利過關。

  第二場三、四班一〇五〇米,「高而靜」呢匹四歲馬沙地性能突出,過往七戰同程取得兩勝四位,表現準繩可靠。晨課操練認真,試跑走勢夠勁,狀態甚勇。今晚原裝配搭角逐首本路程,排中檔起步對發揮有助,同場對手實力唔算太強,起步順利可望一放到底,值得捧場。

  第五場三、四歲馬一三五〇米,「星輝煌」質新馬台型甚佳,上仗初出角逐沙地短途,臨場票數已反映信心不大,結果馬匹起步後跟守在後面位置,末段騎者稍加催策,即追回一席第五。復課隻馬操練加強,試跑走勢大有進步。今晚增程角逐一定更合腳法,馬房季內未開齋,鬥志唔使懷疑,今仗值得再追捧多次。

  第六場四班一五一〇米,「大玩意」呢匹灰馬雖然體重不足一千磅,但陣上表現就甚具鬥心。上仗初配馬雅角逐同程,結果大勝對手而回,表現無懈可擊。復課操練冇偷懶,試跑走勢順暢,狀態更勇銳。今晚升班角逐負磅減輕,對呢匹馬來說有利無害,騎者唔放手一定有理由,跟前鬥後可望再下一城,尾場賽事一於用佢做膽。