捧「潮人」馮耀正中三元

233

  今晚有六場沙地賽事上演,形勢唔係太簡單,選馬宜小心推敲。小妹今日揀選三匹馮耀正馬房嘅參戰馬畀大家參考,各位啱心水可跟進。

  第四場四班一〇五〇米,「多樂飛星」呢匹馬成熟程度甚佳,上季初出角逐同程已有好表現,今季做足工夫復出,結果上仗在沙地短途贏馬開齋,雖然取勝距離唔算太多,不過其姿態較輕鬆。復課操練正常,狀態未有低落。今晚換上馬雅執韁,配搭完整威力不減,對手實力不算強,可望順利連捷。

  第五場二班一〇五〇米,「天際翱翔」沙地短途實力甚強,上仗角逐公開賽遇上頂班短途好手,結果放出後至末段力弱被對手超越,整體表現唔係太差。復課操練工夫認真,馬匹火氣旺盛,狀態甚佳。今晚出爭二班賽事,形勢反客為主,用馬雅操刀決心搏殺,起步順利放出,對手要追亦唔容易,可放心捧場。

  第六場三四班一三五〇米,「軍事潮人」呢匹馬沙地性能突出,今季上陣兩次表現漸入佳境,狀態逐漸冒勇。晨課操練積極,試跑走勢一氣呵成,氣勢逼人。今晚重召高君濤幫忙,騎者今季支持度稍減,難得有實力馬在手,一定會砌盡以顯身價,加上馬匹同程表現出色,尾場賽事可視為捧場重心。