曾寶珠提供

270

  今日有六場草地賽事舉行,形勢較為混亂,加上可能會有雨,揀馬真係要謹慎,小妹今日推介冷門騎師黎昌全嘅三匹座騎,啱心水可過關玩吓。

  第一場四班千五米,「濠江寶」呢匹四歲馬上陣次數唔多,季內兩戰中距離取得一勝一位,表現大把在手。晨課操練積極,試跑走勢急勁,狀態保持水準。今日小休復出,體力方面勝對手一籌,角逐首本路程擺明車馬,排三檔起步形勢有利,順利貼欄領放,可望贏馬收復失地,值得捧場。

  第四場二班千五米,「第六感」呢匹七歲馬較為遲熟,去季取得三勝三位佳績,表現愈戰愈勇。上仗此駒在同程面對強手,最後後上跑第五,負於頭馬兩個多馬位,表現回勇。今日試準再來,負磅較上仗減輕,如果臨場有雨令場地偏慢,對其發揮更有幫助,留前鬥後有力推翻大局,不妨贏位兼投。

  第五場五、六班千二米,「江河八寶」呢匹質新馬去季在同程取得一勝一位,草地短途有根據。今季此駒上陣六次,結果取得四次殿軍,未能跑入三甲有點可惜。今日匆匆再上征途,返回首本路程角逐較合發揮,人馬首度合作可望擦出火花,排二檔起步合其前領跑法,對手實力非強,可望取得今季首場勝仗,半冷門更值得捧場。