曾寶珠提供

448

今日有五場草地及一場沙地賽事舉行,戲碼唔算太差,小妹揀咗三匹馬雅嘅座騎畀馬迷玩吓過關,啱心水不妨跟進。

  第一場三四歲馬千二米草地,「江河明珠」呢匹馬今季在短途表現出色,上仗在同程輕鬆贏馬,取得今季第二場勝仗,表現出色。晨課積極磨練,狀態依然勇邁。今日重投馬雅胯下人馬合拍,角逐三四歲賽事形勢佔優,對手實力平平,可望再贏一仗,值得捧場。

  第四場二三班千二米草地,「土豪來了」五歲馬沙、草地均能應付,上仗在同程排最外檔起步,但最後仍能跑入一席第三,表現回勇。復課操練認真,馬匹走來步頭有力,狀態甚佳。今日排內檔起步形勢佔優,馬雅唔放手一定有理由,跟前鬥後可望重開勝利之門,不妨贏位兼投。

  第六場四五班一0五0米沙地,「登程一號」呢隻馬沙地性能甚佳,上季在同程曾贏馬而回,表現有根據。上仗跑較長路程雖敗但走勢唔係太差。今日落班角逐形勢有利,馬房強配馬雅而來,動態擺明車馬,現時評分低過上季贏馬時候,面對一群實力較弱對手,尾場賽事一於用佢嚟做膽。