曾寶珠提供

216

  今晚有六場草、沙地賽事上演,上陣馬數量唔少,形勢平均選馬宜謹慎,小妹今晚睇好馬雅嘅座騎,介紹三匹畀大家參考,希望可以順利過關。

   第一場五、六班千二米,「聯安神童」呢匹三歲馬長相吸引,上季初出已殺聲震天,當時角逐同程遇上變化地,結果被對手放離保住一席第二,表現唔差。晨課重新備戰,試閘走勢力掩鋒芒,狀態不俗。今晚續由馬雅策騎,排三檔起步形勢不吃虧,留前鬥後可望贏馬開齋,值得捧場。

  第二場四班千五米,「如意飛駒」五歲馬成熟程度不差,不過上仗季內初出在長途就表現令捧場客失望,跟前後末段衝刺不強,最後祇能跑第八。復課重新調教,試跑走勢不差。今晚重配馬雅,人馬合拍,返回上季曾兩勝的中距離上陣,戰意唔使懷疑,角逐四班賽事形勢佔優,可望勝回一仗交代,不妨贏位兼投。

  第四場一、二班一〇五〇米,「豐收寶」呢匹沙地悍將上季七戰沙地取得三勝三位,表現相當準繩。新季操練認真,試跑走勢急勁,狀態甚勇。今晚出爭首本途程,重配贏馬拍檔馬雅,擺明車馬,上季負相同磅位亦能贏馬,今戰排四檔起步對其跑法有助,可望一放到底贏馬,值得作為重心。