曾寶珠提供

186

  今晚有六場草、沙地賽事舉行,形勢相當平均,小妹今晚繼續睇好巴西好手馬雅,介紹佢三匹座騎畀大家參考,各位啱心水可跟進。

  第一場四五班千二米草地,「御龍之星」呢匹馬進步明顯,上仗搏殺有心,點知在最後直路坐包廂,小妹估計以呢隻馬當時走勢,就算贏不到都應該有第二,但最後祇屈居第三,輸得認真不值。復課準備工夫冇偷懶,馬匹試跑走勢夠勁,狀態攀升。今晚再來負磅輕,馬雅再騎一定搏盡,排二檔有助發揮,起步跟出可望在直路突圍而出,一於再追多次。

  第三場一二班千二米草地,「陽江」短途新星實力甚強,上仗在同程以高速放返再下一城,在澳保持三戰全勝,實力深不可測。復課積極打磨,馬匹火氣十足,狀態大勇。今晚有首本路程馬房才安排報名上陣,戰意方面值得信賴,全闊跑道排四檔形勢佔優,起步放出可望輕鬆擊敗對手,賠率熱辣辣都值得支持。

  第五場四班一三五〇米沙地,「順風」台型吸引,上仗做足工夫搏殺,可惜埋門被另一初出馬擒下,祇能跑回一席第二,不過表現已露光。復課操練持續,拼過一仗後馬匹狀態有進,今晚原裝人馬再跑同程,吸收過一次陣上經驗後,相信對呢匹馬發揮有正面幫助,騎者殺得性起,交回上仗水準可望贏馬收復失地,可放心追捧。