曾寶珠提供

188

  今日有六場草地及一場沙地賽事舉行,形勢唔算太複雜,希望實力馬可交出好表現。小妹今日揀咗三匹心水畀大家參考,賠率有冷有熱,啱心水不妨跟進。

  第四場二班千五米,「珍珠勁旺」呢匹馬愈跑愈進步,上季在沙地賽事表現當然犀利,不過轉跑草地同樣發揮威力,上季尾一役騎師甩腳踏失晒平衡,但隻馬最後仍以勁勢超越對手贏馬,除了騎師騎技超卓外,亦反映呢隻馬實力甚強。晨課操練功夫夠積極,試跑走勢夠勁。今日原裝人馬再來,遇上一群實力唔係太強對手,相信可繼續交出好成績,可放心支持。

  第六場四班千二米,「玉樹臨風」呢匹馬來自日本,當然係要時間適應,今季上陣兩仗,出閘方面已經有改善,而馬匹在末段亦能交出好走勢,相信已漸入佳境。晨課備戰功夫認真,馬匹狀態有進。今日降班上陣形勢不同,排二檔起步有助發揮,韋爾納開季後尚未贏馬,鬥志唔使懷疑,半冷門不妨贏位兼投。

  第七場二班千五米,「勁威王」五歲馬成熟程度日趨成熟,上仗出爭長途結果在出色留放下贏馬收復失地,人馬表現突出。復課操練冇偷懶,馬匹狀態更勇。今日仍由史偉恩執韁,人馬合拍一定搏盡,馬房開季後成績平平,今日布下強陣一定有計,尾場賽事兩駒列陣不分正副,但小妹比較喜愛呢匹馬,排檔理想可望再下一城。