曾寶珠提供

277

  今晚有七場草、沙地賽事舉行,形勢較為平均,小妹今日揀選巴西好手馬雅三匹座騎畀大家參考,各位啱心水可跟進。

  第三場二三班千二米草地,「銀寶貝」呢匹自購馬外地上陣六次,結果取得兩勝,整體實力未見底。來澳後操練功夫積極進取,試閘走勢落腳輕巧,狀態具作戰水準。今晚初出原用奧查魯操刀,不過騎者同場有座騎選擇,所以幕後找到巴西旺人馬雅操刀,希望可以幫到呢匹馬發揮,做足功夫可望一出交出好表現,可贏位兼投。

  第四場一二班千二米草地,「靠譜少爺」短途實力甚強,上仗季內初出角逐中距離路程,礙於熱身不足兼長力平平,結果落敗而回。復課積極備戰,試跑走勢夠勁,狀態返回贏馬時水準。今晚重返首本短途賽上陣,馬雅唔放手一定有計,雖然負磅係重,但呢匹馬級數足夠,面對一群熟口熟面對手,跟前鬥後可望收復失地,值得支持。

  第六場四五班一三五0米沙地,「順風」初出自購新馬,本身台型不俗,相信現時評分不代表真正實力。晨課操練認真,早前一課草地試閘,沿途跟前競逐,末段鞍上人紋風不動,馬匹已自動湧上,走勢令人驚喜。今晚初出角逐沙地賽事,馬房部署捨難取易,用馬雅操刀決心不小,對手實力唔算強,可望一嗚驚人。