曾寶珠提供

208

  今日有六場草地黃昏賽事上演,戲碼亦唔算太差,小妹今日睇好高君濤嘅座騎,來到季尾呢位上屆冠軍一定搏盡,啱心水可跟進。

  第一場五六班千五米,「勁易泰」呢匹馬近期狀態甚佳,上仗在中距離起票搏殺,結果跟守在中間位置,末段發力透出即彈開對手贏馬,表現出色。復課準備功夫冇偷賴,試跑走勢勁力十足,狀態冇得彈。今日原裝人馬再出擊,排內檔起步對其幫助甚大,對手實力唔算強,且留且放可望再贏一仗,值得支持。

  第三場三四班千五米,「一帶一路」跑法主動,中距離實力亦有根據。近兩仗搏殺失手,之後轉投另一馬房訓練,馬匹狀態應該影響唔大。今戰強配高君濤打硬仗,睇得出馬房部署亦不敢怠慢,出爭首本路程排六檔起步,七駒角逐場合,前段要貼欄領放應該問題不大,呢件綵衣鬥志十足,贏位兼投可望有所收穫。

  第五場二班千五米,「陽江之星」呢匹馬跑中長途最合腳法,今季八戰在草地取得兩亞,與頭馬始終無緣。上仗沙地後上得第四,末段追回不少失地。晨課操練功夫認真,狀態回勇。今日角逐中距離腳法正宗,高君濤唔放手一定有計,馬房出名鬥志如虹,季內未交代分子一定搏,均勢場合不妨看高一線。