曾寶珠提供

389

  今日繼續有六場草地賽事上演,戲碼唔算太差,小妹今日揀咗錢健明馬房三匹參戰馬畀大家參考,啱心水可玩吓過關。

  第一場未勝馬千五米,「小林之友」呢匹四歲馬季內上陣次數唔多,本身成熟程度未算太足,陣上走規亦有待改善。上仗在同程後上得第五,末段追回甚多失地。復課操練夠認真,馬匹狀態明顯有進。今日出戰處女馬賽事,對手實力唔算強,恩利克試準再騎,戰意唔使懷疑,跟進鬥後可望贏馬開齋,值得捧場。

  第四場二、三班千五米,「鑽石奇才」質新自購馬,外地表現算穩定,來澳後經過水土適應,上仗角逐草地同程採取放鳶戰略,最後力拼下得第四,走勢大有進步。今日馬房不敢怠慢,立即強配大師傅高君濤替此駒搏殺,排四檔起步正合馬匹跑法,對手雖然唔簡單,不過若前中段佔到先機,對手要追亦不容易,半冷更有博取價值。

  第五場四班千五米,「鼎豐」四歲馬,進步空間甚多,上仗在同程力拼不敵對手「聖威王」,該駒在上賽復出仍能輕勝,可見該役雖敗猶榮,賽事水準不低。晨課馬匹操練積極,試跑走勢急勁,狀態大勇。今日仍由何華麟策騎,所遇對手實力未算太強,交回上仗水準,今仗可望贏馬收復失地,值得追捧。