曾寶珠提供

416

  今日係年度盛事澳港盃大賽日,戲碼緊湊場面熱鬧,小妹今日揀咗三匹心水馬畀大家參考,啱心水可玩吓過關。

  第三場二三歲馬千二米,「聯安之鷹」呢匹新馬台型夠吸引,在澳上陣三次均輕取對手,表現大把在手。晨課準備工夫絕不偷懶,試閘走勢力掩鋒芒,狀態大勇。今日出爭表列賽,路程專家負磅較上次更輕,可謂集有利條件一身,祇要起步順利,呢場頭馬應可輕易取得,可作為過關穩膽。

   第五場四歲馬千五米,「珍珠勁旺」四歲馬精英季內目標明確,雖然近兩仗未能贏馬,不過表現亦唔算太差。晨課由冼文諾過檔操練,期間走勢愈來愈勁,狀態回勇。今日平磅角逐佔盡優勢,中距離表現亦較長途穩定,排檔理想可望在打吡預賽先聲奪人,賠率熱辣辣仍可放心捧場。

  第七場二三班千八米,「聯誠福星」體重雖然唔夠一千磅,不過馬匹跑法靈活且具鬥心,最近五次賽事取得一勝四位佳績,表現十分穩定。晨課操得食得,狀態完全冇問題。今日用到靚仔騎師李寶利去騎,戰意方面唔使懷疑,呢匹後勁馬啱晒佢發揮,負一百廿八磅唔算重,尾場賽事一於用佢做重心啦!