曾寶珠提供

578

  今日有六場草地黃昏賽事舉行,上陣馬仍算踴躍,小妹今日揀咗馬雅三匹座騎畀大家參考,啱心水可玩吓過關。

  第三場二、三班千二米,「北方傳說」呢隻馬近況回勇,上仗由馬雅接手策騎,結果在沙地後上得第二,末段走勢凌厲,表現甚佳。復課準備工夫積極,馬匹狀態更勇。今日返回季內三度跑第二的路程角逐,戰鬥力提升不少,鞍上人唔放手一定有計,遇上對手實力較弱,可望後上贏馬收復失地,值得追捧。

  第五場三、四班千五米,「江河壹寶」呢匹馬場地適應力幾強,季內在唔同路程及場地均能交出好表現,不過就始終與頭馬無緣。晨課操練正常,埋門交由馬雅試閘,馬匹走來腳法順暢,狀態絕對唔差。今日角逐中距離腳法合適,人馬重逢一定搏到盡,排內檔起步對其跑法有助,贏位兼投可望有所收穫。

  第六場四、五班千八米,「福艾達」呢匹馬體型細小,體重不足九百磅,唔知係咪呢個原因,此駒季內十一戰均不入三甲,評分較季初已調整不少。不過翻查賽績,季內此駒在同程有兩次跑第四紀錄,而且走勢唔係太差。今日難得用到馬雅執韁,相信馬房都係希望畀呢隻馬一個最好機會去展現實力,假如能交回嗰兩次走勢,在今場賽事中已經夠條件贏馬,尾場賽事形勢混亂,小妹決定支持吓呢隻馬,希望會有回報啦!