捧馬雅頭三場座騎發「威」

401

  今晚有六場沙地賽事舉行,參賽馬數量唔多,小妹今晚依然睇好馬雅座騎,揀選三匹畀大家過關玩吓。

  第一場五、六班一三五〇米,「開心知己」呢匹馬沙地性能有根據,今季四戰取得兩亞成績,整體表現亦算不差。晨課操練正常,狀態具作戰水準。今晚重配馬雅戰意值得信賴,出賽唔多場合,角逐首本路程合晒發揮,跟前鬥後可望贏馬交代,頭場賽事可優先留意。

  第二場三、四班一三五〇米,「駿金剛」呢匹四歲馬陣上演出算穩定,前仗初配馬雅在同程輕勝而回,上仗換人上陣在草地短途亦能入位,可見馬匹在進步中。晨課備戰積極,試跑走勢有力,狀態甚勇。今仗人馬重逢,返回贏馬路程出擊可見信心十足,呢個孖倉今季成績突出,此類實力馬可拼必拼,縱成熱門仍值得捧場。

  第三場二、三班一〇五〇米,「威力祺」沙地短途表現突出,季內由新倉接手訓練後,已兩度在同程跑入連贏,但可惜與頭馬無緣。晨課操練認真,馬匹狀態起得不俗。今仗重召馬雅幫手,台前幕後戰意唔使懷疑,負一二七磅唔算重,起步順利守有利位置,直路上可望將對手一網打盡,可放心用佢做膽。