捧雙「金」孖寶「如意」

475

  今日續有五場草地黃昏賽事舉行,上陣馬數量唔算太多,場地實際狀況臨場宜留意。小妹今日揀咗三匹心水馬畀大家參考,啱心水不妨跟進。

  第二場三、四班千八米,「金奔馳」呢匹八歲馬過往擅長在沙地作賽,不過今季此駒性能竟然轉變甚大,沙地賽事表現平平,反而在草地長途交出不俗成績。上仗不敵廄侶已交回應有水準,今日換上留放更有分寸的騎師何華麟執韁,相信發揮上更得心應手,對手實力非強,留前鬥後可望勝回一仗交代,值得捧場。

  第三場二班千二米,「妙算金龍」千二米短途專家,季內在同程取得兩冠三亞三季佳績,表現準繩。上仗此駒力拼下以半馬位不敵對手得第三,若非最後一百米曾收慢,相信該仗或已勝出。復課操練認真,狀態保持水準。今日續由查維斯操刀,人馬合拍一定砌到盡,排二檔起步形勢有助,不妨贏位兼投。

  第五場四、五班千二米,「康泰如意」呢匹三歲馬台型甚佳,上仗初出已殺聲震天,臨場票數亦十分硬朗,可見幕後信心十足。可惜此駒在該仗起步不久便受阻收慢,馬匹步韻受影響下,末段再衝上為時已晚,以短距離屈居亞軍。復課馬匹操練認真,試跑走勢大有進展,狀態甚勇。今日捲土重來排二檔起步,形勢較有利,高君濤再騎一定盡拼,對手不多可望贏馬收復失地。