捧閃耀陽光跨季再贏

613

  今日有六場沙地賽事上演,上陣馬數量唔算太多,小妹今日揀選三匹沙地性能特佳嘅馬匹畀大家參考,希望可以順利過關。

  第一場條件賽一0五0米,「東方盈悅」呢匹三歲馬上季表現已顯露一定實力,上仗季內初出角逐同程,結果以輕鬆姿態放返,贏來大把在手。復課操練認真,馬匹狀態更勇。今日角逐特別條件賽形勢佔上風,黎家駒難得有實力馬在手,一定拼盡,加上呢件綵衣向來鬥志十足,交回上仗水準應可再下一城,值得捧場。

  第二場三、四班一三五0米,「寶寶」陣上表現穩定,上季在沙、草地賽事合共取得三勝四位佳績,表現愈戰愈勇。晨課準備工夫循序漸進,馬匹狀態具作戰水準。今日小休復出角逐沙地,性能方面唔使懷疑,馬雅執韁人馬夠晒合拍,跟前鬥後可望勝回一仗,不妨贏位兼投。

  第三場一、二班一五一0米,「閃耀陽光」呢匹五歲馬上季表現光芒四射,上季最後六仗取得三冠三亞佳績,尤其在沙地表現出色,輕取強手表現有餘未盡。晨課操練工夫認真,試閘走勢一氣呵成,走勢甚勁。今日續由最佳拍檔蔡義武執韁,人馬合拍一定盡拼,中距離路程腳法合適,加上馬房戰意鮮明,且戰且走可望取得佳績,不妨追捧。