捧錢健明旗下馬有「寶」

1006

  今晚有六場草、沙地賽事舉行,上陣馬唔算太多,形勢平均慎防冷馬當道,小妹今晚睇好錢健明馬房三匹上陣馬,希望全部可以有好表現。

  第三場二班千五米,「皇庭之寶」呢匹五歲馬草地中距離實力不弱,季初在同程贏馬後,馬房一直按兵不動。上仗角逐沙地中距離落敗,性能不合可謂意料之內。拼後勤加操練,狀態不弱。今晚重返勝途作賽,戰鬥力提升不少,交由高君濤執韁唔似求減分,留前鬥後可望交出好成績,一於贏位兼投。

  第四場三、四班千二米,「創新福友」呢匹馬自從易主兼更改馬名後,陣上演出完全唔同。最近在草地短途發展,四戰取得兩勝兩位佳績,表現愈戰愈勇。晨課操練認真,狀態水準之上。今晚續由老拍檔何華麟執韁,人馬合拍一定搏盡,排二檔起步可謂如虎添翼,值得追捧。

  第五場四、五班一〇五〇米,「聯誠歡聲」三歲馬台型不俗,初出一役在沙地短途成熱門落敗,上仗配上恩利克捲土重來,臨場成為四十倍大冷,不過馬匹表現神勇,起步後搶放至埋門始不敵強手得第二,可見沙地性能不弱。晨課操練加強,狀態大有進展。今晚試準再來,原裝配搭勝在夠合拍,排中檔起步正合發揮,可望贏馬收復失地。