捧恩利克鑽飾銀河「勁旺」

947

  今日繼續有六場草地賽事舉行,上陣馬數量較多,料賽果暴冷暴熱居多,小妹今日揀咗三匹恩利克座騎畀大家參考,啱心水可跟進。

  第二場四班千五米,「鑽飾銀河」呢匹三歲馬季內進步神速,最近兩仗同程採取留前鬥後跑法贏馬,表現未受考驗。晨課積極打磨,試跑走勢甚勁,狀態大勇。今日小休再來體力回復,出爭首本路程擺明車馬,馬房精兵上陣,戰意唔使懷疑,恩利克熟手操刀,可望取得三連勝。

  第三場一、二班千五米,「珍珠勁旺」馬王級分子,雖然今季上陣次數唔算頻密,但馬匹整體表現能夠維持高水平,馬房上下手足應記一功。上仗角逐同程留放經已一絕,可惜力拼下仍以極短距離屈居得亞軍。復課重新備戰,試跑走勢急勁有力,狀態未有低落。今日角逐首本路程決心求勝,恩利克執韁駕輕就熟,縱負最重磅與對手周旋,但祇要留放得宜,有力贏馬收復失地,不妨贏位兼投。

  第六場三、四班千二米,「兄妹同心」呢匹四歲馬外地上陣次數不多,三戰取得兩亞成績,表現穩定。上仗初出角逐沙地短途搏殺有心,惜馬匹起步稍慢,結果末段力追跑回一席第四,走勢露光。復課操練認真,試閘走勢洶湧,狀態甚佳。今日轉爭草地短途性能合適,恩利克唔放手一定拼盡無保留,對手實力唔算強,尾場賽事不妨作為捧場重心。