捧恩利克三駒執到「寶」

497

  今日仍有五場沙地賽事上演,上陣馬較為疏落,小妹今日揀咗巴西騎師恩利克三匹座騎俾大家參考,啱心水可玩吓過關。

  第一場四、五班千六米,「明軒一號」呢匹五歲馬上季上陣次數頻密,狀態方面卻能長期保持。季尾一連四仗在沙、草地不同路程上取得佳績,表現更勝季內其他時期。復課操練正常,狀態依然勇銳。今日出爭沙地中距離腳法合適,人馬重逢一定拼盡無保留,排內檔起步對其跑法有助,對手不多不妨贏位兼投。

  第二場四班一三五〇米,「英記好友」雖然年屆八歲,不過陣上演出卻保持甚高水準。上季尾先在草地短途取得勝仗,接着出爭沙地同程更以輕鬆姿態大勝對手,表現超級。復課操練正常,恩利克親試多課,可見十分重視。今日升班角逐形勢未算太吃虧,負磅較上次贏馬時多一磅,交回水準可望順利取得三連勝,值得捧場。

  第五場四班一〇五〇米,「柏雪之寶」另一匹八歲老黃忠,上季上陣次數不少,全季取得三冠一亞兩季成績,整體表現遠勝不少高班戰駒。復課以慢操為主,體力方面得以回復。今日返回四班角逐,形勢上反客為主,出爭首本短途必把握機會爭取好表現,排二檔起步對其發揮有助,人馬重逢戰意不用懷疑,尾場賽事可作半冷捧場。