捧張兆煊蒜片起「孖」

480

   今晚有六場沙地賽事舉行,形勢相當緊湊,小妹今晚睇好張兆煊馬房嘅參戰馬,揀選三匹畀大家參考,希望可以順利過關。

  第二場二、三班一五一〇米,「蒜片尖椒」呢匹四歲馬外地表現唔錯,來澳後陣上演出亦可保持,不過馬房仍在摸索階段,希望可以找到呢隻馬嘅最佳出路。上仗在草地中距離後追跑第三,末段走勢甚佳。今晚轉戰沙地唔係講玩,配上冼文諾更反映馬房信心十足,試準而來可望贏馬打破悶局,半冷不妨捧吓場。

  第三場二、三班一〇五〇米,「蒜片辣椒」質新馬沙地性能突出,上仗在同程前段跟得輕鬆,結果直路上透出即輕易贏馬,表現大把在手。晨課備戰認真,狀態仍勇。今晚角逐二、三班混合賽形勢唔算吃虧,再戰贏馬路程馬房有意爭取連捷,馬雅不放手一定有原因,可放心追捧多次。

  第五場六班一三五〇米,「江河孖寶」呢匹馬陣上演出準繩,來澳後取得一亞九季成績,經常後上不及跑第三,未能贏馬認真可惜。今晚重返沙地角逐,場地性能唔使懷疑,查維斯最近與此駒合作四次全入三甲,人馬表現合拍。今晚祇要留放得好,可望將名次提升,贏位兼投應有唔錯收穫。