捧張兆煊三駒「創富」

753

  今晚有五場沙地賽事上演,係今季最後一次沙地編排,小妹今晚揀選張兆煊馬房三匹參賽馬俾大家參考,啱心水可贏位過關。

  第一場五、六班千六米,「明軒一號」呢匹五歲馬今季上陣次數唔少,現時評分與季初比較,其實已調整了不少。前仗在沙地一三五〇米力拒對手贏馬,上次轉爭草地長途有場地之助,結果以大冷身分取得一席第三,表現吸引。今晚重投贏馬拍檔高君濤,返回沙地中距離路程腳法合適,加上馬房爭奪今季冠軍在數字上仍有希望,戰意方面唔使懷疑,順利放出可望取得季內第二場勝仗,值得捧場。

  第二場三、四班一〇五〇米,「魁隆」沙地性能出色,今季在沙地賽事取得三勝五位佳績,表現愈戰愈勇。上仗成為兩倍大熱表現不負眾望,直路上發揮出較強勁度,力拒對手來犯順利連捷。復課操練工夫未有放緩,狀態仍處於勇境。今晚雖然要負重磅與對手周旋,不過馬匹狀態大勇,加上有老拍檔恩利克壓陣,可望再次創出佳績,贏位兼投希望可有所收穫。

  第三場三班一三五〇米,「創富傳承」質素仍新,今季初出即在同場以輕鬆姿態贏馬,表現大把在手。最近兩仗馬房求勝心切,短時間內安排此駒上陣兩次,結果兩次均遇上伏兵,飲恨得第二,表現出色。小休後重新展開操練,試跑走勢順暢,狀態大勇。今晚換上張志立一試,返回贏馬路程角逐甚合發揮,上陣馬不多場合排外檔影響不大,只要鞍上人鎮定從事,可望順利贏馬而回,不妨重視。