捧史偉恩兩駒連捷

332

  今日有五場沙地黃昏賽事舉行,上陣馬數量唔多,戲碼平淡。小妹今日推介三匹沙地勇馬畀大家參考,順利過關回報亦唔差。

  第三場二班一三五〇米,「健而快」呢匹四歲馬質素甚高,在澳初出即在草地短途贏馬,之後兩戰雖然表現略失望,但上仗初戰沙地即回復水準,在同程輕鬆後上贏馬,表現大把在手。復課準備功夫充裕,馬匹狀態更勇。今日留待合適途程才報名上陣,戰意唔使懷疑,對手實力與上仗相若,可望再下一城,值得追捧。

  第四場三、四班一〇五〇米,「大魔王」呢匹三歲馬實力甚強,除初出一役以頭位之微屈居第二外,近兩仗在沙地短途均以無敵姿態贏馬,表現有餘未盡。復課操練積極,狀態更勇。今仗配上高君濤而來,戰鬥力可謂有增無減,交回上仗之水準,相信可輕鬆再贏馬,賠率熱辣辣唔緊要,穩穩陣陣齋買獨贏已足夠。

  第五場四、五班一〇五〇米,「金槍霸」呢匹兩歲馬早熟速高,上仗初出已殺聲震天,結果在同程輕取對手,過程完全未受考驗。晨課準備功夫認真,馬匹勝後狀態勇進。今日因何華麟停賽關係,交由史偉恩執韁亦屬理想配搭,上陣馬不多場合,排外檔起步影響不大,起步放出後可望直領到底,尾場賽事可作為重心。