捧劉永康三駒執「金」

350

  今晚有五場沙地賽事上演,上陣馬數量未算踴躍,小妹今晚揀選騎師劉永康三匹座騎畀大家參考,希望可以順利過關,啱心水可以跟進。

  第一場特別條件一〇五〇米,「量子力學」呢匹五歲馬沙地性能獨沽一味,季初轉交由謝偉豪馬房訓練後,陣上表現漸復水準。上仗馬房安排在一三五〇米路程搏殺,可惜馬匹起步時屹立不動,全程處於較後位置,落敗不可作準。晨課重新調教,試閘起步已有改善。今晚重返短途角逐有根據,負輕磅角逐可望有助發揮,留前鬥後可望交出好成績,值得贏位兼投。

  第三場二班一三五〇米,「西門吹雪」質新分子持續進步,加上場地性能廣泛,前途應無可限量。上仗在沙地中距離大勝對手而回,過程完全未受考驗。復課積極打磨,試跑走勢急勁,狀態大勇。今晚雖然縮程角逐,不過相信對呢匹馬發揮未會構成太大影響,鞍上人申請以罰款代替今晚停賽,好大機會都係為了呢匹馬既帥權,所以鬥志唔使懷疑,交出上仗水準可望再下一城。

  第五場四班一五一〇米,「紅日金駒」呢匹四歲馬早前由豪廄接手訓練,陣上演出竟然大有改善,前仗在草地中距離力拼得第二,上仗轉爭沙地克服場地障礙,埋門回氣反先對手贏馬開齋,人馬表現出色。晨課馬匹準備工夫未有鬆懈,狀態依然處於勇境。今仗升班角逐負磅減輕,排中檔起步形勢唔算太吃虧,信賴馬房鬥志,且留且放可望爭取多一場勝仗,值得留意。