捧三匹新勝馬「好運」

15

  今晚有六場草、沙地賽事舉行,上陣馬數量踴躍,小妹今晚睇好三匹新勝馬既機會,雖然賠率會較熱,但順利過關都有不俗回報。

  第一場二、三班千五米草地,「輝煌昇」呢匹質新馬雖然長相平平,但陣上演出卻相當忠心,季內三戰短途千二米均能後上取勝,而且過程輕鬆,可見評分方面依然佔優。復課操練積極,試跑走勢雖然唔多起眼,不過馬匹狀態甚勇,步步有力。今晚初戰中距離馬房部署一定有其理由,而呢匹馬前中段落腳唔快,增程角逐係一個正確選擇,頭場賽事可望先拔頭籌。

  第三場三、四班一三五〇米沙地,「好運先生」呢匹三歲馬近況勇得交關,近兩戰沙地均以輕鬆姿態取勝,過程可謂全未受考驗,亦可以見到呢匹馬沙地性能甚佳。今晚操足再上征途,雖然係縮程而來,但相信以其實力絕對唔會有所影響,恩利克押陣人馬夾檔,六檔起步跑法上可以更靈活,馬房對呢匹馬寄望好高,贏埋今場再作部署,可放心捧場。

  第六場四班一〇五〇米沙地,「大魔頭」質新分子台型不差,上仗初出角逐同程搏殺有心,結果在南非小將艾比胯下贏馬,可見實力甚強。復課操練認真,試跑走勢翻步有力,狀態更勇。今仗改由余健雄操刀,騎者為爭今季冠軍一定唔會三心兩意,排四檔起步形勢有助,交回上仗水準,尾場賽事應可順利取勝,值得追捧。