今日有八場沙、草地賽事上演，參戰馬數量仍算踴躍。小妹今日揀咗三匹實力馬畀大家參考，賠率雖然熱熱哋，但勝在穩穩陣陣，希望可以交出佳績，啱心水不妨跟進。
第二場四班一〇五〇米，「安達雙雄」呢匹質新分子季內先在草地短途熱身兩仗，之後轉戰沙地短途即爆冷贏馬，而上仗再出角逐同程成為兩倍熱門，結果起步放出後直領到底，大勝對手十二個馬位，表現跨張。今次升上四班角逐形勢依然佔優，續由見習生李路執韁人馬合拍，起步順利領放，相信對手亦難以對其構成威脅，再下一城應該問題不大，可放心捧場。
第四場一、二班千五米，「獨步天下」呢匹本地最高分嘅現役賽駒，場地及路程適應能力甚強，季內在草地賽事兩戰全勝，表現大把在手。晨課操練正常，試跑走勢步履輕盈，狀態甚勇。今日回師中距離上陣腳法合適，重投高君濤胯下操刀人馬合拍，馬房近期賽事氣勢凌厲，鎮倉寶能夠出賽一定盡拼爭取獎金，對手實力熟口熟面，交回水準可望順利再贏一仗。
第五場四班千二米，「喜運孖寶」呢匹五歲馬戰鬥力持續保持，去季在同程取得三勝兩位，表現穩定可靠。今季經過幾仗熱身後，前仗在同程輕鬆重開勝利之門，上周再戰不敵超班對手得季軍，表現仍有水準。今日匆匆再上征途，馬房部署明刀明槍，難得馬匹狀態未回落，又有合適路程可以角逐，鬥志方面不用懷疑，轉配約尼斯勝在戰意十足，對手不多可望重響勝鼓。