今日安排有五場草地賽事上演，場地有可能起變化，臨場狀況值得留意。小妹今日揀咗三匹狀態大勇嘅參戰馬畀大家參考，希望可以順利過關，啱心水可跟進。
第一場四、五班千二米，「烈火戰駒」七歲馬雖然實力與盛年比較有較大差距，不過馬房保養功夫得宜，今季陣上亦能交出好表現。上仗贏馬後再出本來有機會爭取上名，不過鞍上人在末段取位猶豫，最後只能跑回一席第五。復課積極備戰，狀態勇進。今日重配贏馬拍檔高君濤擺明車馬，場地偏慢亦合馬匹發揮，對手實力唔算太強，不妨贏位兼投捧場。
第二場四班千八米，「力奇神駿」呢匹四歲馬今季成熟程度理想，自轉投林宏基馬房後，陣上演出有脫胎換骨之感。上仗初戰沙地中距離路程，馬匹末段愈衝愈勁，結果終點前力壓對手贏馬，取得季內第三場勝仗，人馬表現出色。復課操練認真，馬匹狀態甚勇。今日返回草地長途表現有根據，加上變化地對其影響不大，對手無多可望取得三連勝，可放心捧場。
第三場二、三班千二米，「夠響贏瑪」質新分子前速銳利且場地性能廣泛，季內在同程已取得四冠兩亞佳績，表現愈戰愈勇。上仗埋門被對手超越以短距離飲恨，可見馬匹狀態大勇。晨課備戰正常，試跑走勢急勁。今日出爭首本路程擺明車馬，重投約尼斯胯下人馬合拍，場地軟慢大大提升其爭勝機會，值得追捧。