冼文諾手執「珍珠」「翡翠」

775

  今日有六場草地賽事舉行,上陣馬較為踴躍,形勢緊湊選馬宜小心推敲,小妹今日睇好騎師冼文諾三匹座騎,希望可以順利過關。

  第一場五六班千二米,「江山玉龍」呢匹五歲馬雖然質素唔算突出,不過勝在健康穩定。前仗在同程贏馬開齋表現出色,可惜上仗再出表現走樣,全程居中未能替捧場客再下一城。晨課操練正常,狀態保持作戰水準。今日換上冼文諾策騎,戰鬥力提高不少,路有專長一定盡拼,贏位兼投希望有所收穫。

  第三場公開賽千五米,「珍珠勁旺」上季五捷表現鋒芒畢露,雖然季內五戰未能取得勝仗,但在草地同程四戰得三亞一季,演出穩定。晨課操練工夫認真,狀態保持上仗澳港盃的水準。今日繼續由老拍檔操刀,目標瞄準擺明車馬,平磅角逐形勢唔算吃虧,跟前鬥後可望贏馬交代,值得追捧。

  第六場四班千五米,「翡冷翠」呢匹六歲馬成熟程度理想,季內陣上演出準繩,上仗在長途不敵質新馬得第二,表現交回水準。今日縮程角逐中距離路程,季內曾在此程得第二,腳法絕對可應付,加上配上好手執韁,相信發揮會有所不同,馬房兩駒列陣各為其主,小妹比較喜歡呢匹作為捧場重心,希望可以順利食尾糊,不妨捧場。