今日高君濤座騎「勁」

181

  今日繼續有六場草地賽事舉行,不過場地狀況未明,臨場宜留意。小妹今日揀咗三匹高君濤座騎畀大家參考,啱心水可跟進。

  第二場六班千五米,「勁易泰」呢匹馬場地適應力強,雖然近期成績未見有突破,不過馬匹陣上走勢保持水準,甚少會大敗。晨課操練正常,低班馬中狀態算是保持得到。今日仍由高君濤執韁,人馬合拍一定盡拼,對手實力五十步笑百步,祇要前段能跟守較前位置,末段可望透出與對手交鋒,可贏位兼投。

  第三場一二三班千二米,「大合金」四歲精英今季以一系列同齡錦標為主要目標,馬房部署方面亦明刀明槍,季內五戰同程取得三冠兩季成績,馬匹演出準繩。晨課積極操練,狀態甚勇。今日出爭首本路程,為爭取足夠分數一定會盡拼,高君濤押陣夠合拍,對手不多場合,留放得宜可望再下一城,可放心支持。

  第六場二三班千二米,「聯安之寶」呢匹馬實力不弱,今季初在短途兩戰均上名,表現絕對不差。上仗敗後小休一輪,近期重新備戰,埋門試跑走勢甚佳。今日休後復出角逐短途並不嫌短,高君濤押陣配搭完整,同場對手實力不強,祇要前段唔落後太遠,以其後勁可望在最後直路反先,半冷不妨一搏。