今日捧冼文諾三駒「勁旺」

481

  今日有六場草地賽事上演,戲碼緊湊且場面熱鬧,小妹今日揀咗三匹冼文諾座騎畀大家參考,希望可以順利過關。

  第一場六班千二米,「亮點」呢匹七歲馬雖然質素已見底,不過身處六班始終有一定爭勝能力。上仗在草地中距離後上得第三,末段追回甚多失地。此駒復課操練正常,狀態長期呈勇。今日配上客串騎師操刀,以騎者騎功應可幫到呢匹易位難贏馬發揮,對手實力似強非強,可贏位兼投。

  第二場二、三班千五米,「聯安之鷹」呢匹馬陣上表現準繩,今季上陣五次,取得兩亞兩季一殿佳績,而上仗在同程後上得第二,證明長力足夠。復課操練認真,試跑走勢夠勁,狀態甚勇。今日改配好手策騎,可見馬房有心部署出擊,試準而來鬥志唔使懷疑,負磅不重可放心支持。

  第三場二級賽千五米,「珍珠勁旺」上季打吡冠軍盟主,戰績出色表現準繩。今季此駒跑過三仗,除沙地一役表現較失望外,其餘兩仗在草地表現不俗,不敵強手屈居第二,表現保持得到。今仗重投冼文諾胯下,人馬去季合作三次全勝,合拍程度不用懷疑,錦標當前戰意值得信賴,放心捧場。