一檔馬戰績「輝煌」實力「強」

370

  今日有六場草地賽事舉行,上陣馬數量不少,料賽果暴冷暴熱居多,小妹今日揀咗三匹一檔馬畀大家參考,啱心水可跟進。

  第一場特別條件千五米,「伯樂汪洋」呢匹四歲馬雖然體型單薄,不過陣上表現卻甚為穩定。上仗季內初出角逐短途作熱身,結果後上跑回一席第五,負於頭馬距離不多。復課備戰加強,練者在晨課一手操練,可見相當重視。今日返回上季贏馬路程上陣,戰鬥力提升不少,恩利克策騎人馬合拍,利用內檔之助,可望順利贏馬交代,值得捧場。

  第四場三班千五米,「輝煌昇」五歲馬幕後寄予厚望,上季取得四勝一位佳績,評分方面亦水漲船高。季初安排在沙地中距離路程熱身,上仗轉戰首本的草地中距離賽事,結果後追跑回一席第二,末段追回不少失地。今日雖然騎師何華麟選擇策騎同場另一駒,但並不代表此駒機會不被看好,換上日將田中正一執韁勝在鬥志高昂,留前鬥後可望贏馬而回,不妨贏位兼投。

  第五場六班千五米,「強勁充沛」呢匹處女馬陣上經常受追捧,季內兩戰表現令人失望,尤以上仗在最後直路上受阻影響走勢,最後跑回一席第六而回。復課重新調教,試跑走勢並無不妥。今日仍由高君濤策騎,騎者不放手相信必有原因,排一檔起步料對其發揮有幫助,且留且放可望贏馬打破悶局,不妨追捧多次。