「皇帝」「戰士」見水即生

398


  
今日有六場草地黃昏賽事舉行,場地唔使講一定係爛地,所以小妹今日亦揀選咗三匹擅跑變化地的馬畀大家參考,希望可以取得佳績。

  第一場五、六班千二米,「力奇寶寶」呢匹四歲馬尚有進步空間,季內曾在同程取得兩捷,其中一仗係變化地,可見呢匹馬對於軟慢場地表現特別適應。上仗在沙地走勢接近,今日重配贏馬拍檔馬雅執韁,搏殺決心唔使多講,馬房季尾攻勢不斷,路合檔佳可望一放而回,值得捧場。

  第四場二班千五米,「千億皇帝」呢匹五歲馬表現進步,上周角逐打吡大賽旨在參與,全程採取主動跑法,直路上墮退落敗意料之內。今日匆匆再上征途,強配高君濤擺明車馬,同程軟地季內曾輕勝對手,可見其軟慢地表現特佳,起步順利可望直領到底,不妨贏位兼投。

  第五場三、四班千二米,「大戰士」六歲馬成熟程度有進,前仗同程爛地採取留前鬥後跑法,末段一衝即超越對手贏馬,表現精彩。上仗返回所屬評分範圍賽事角逐,惜起步不久曾受阻要勒避,末段再追祇能跑回一席第二。今仗操好再來,續由查維斯執韁戰意高昂,排中檔起步有助發揮,變化地可望贏馬收復失地。