錘仔訪奧脫福最怕球證

477

  周中罕有沒有英超,不過卻安排了足總盃16強比賽。雖然與聯賽或歐冠相比,足總盃只算是雞肋賽事,不過踢多幾場便有望封王,參與球隊料不會過分揸流攤。曼聯兵多將廣,奧脫福球場迎戰韋斯咸,上盤縱讓至一球,仍然有望過關。

  白頭沈希望曼聯上仗與愛華頓同歸於盡,可惜好夢落空,儘管雙方各三戰平,但卻沒有出現互相晒靴的玉石俱焚場面。拖肥糖不是很茅的嗎?為甚麼不出力踢跛幾個魔兵呀?對利物浦就大大力,對曼聯就細細力,食咗軟骨散乎?

  廢話少講,今場是曼聯連續第三場於奧脫福比賽,所有球員都無傷無病可以候命披甲。領隊蘇斯克查當然可以選擇留力,但畢竟已經去到16強階段,白頭沈相信他們會強陣出擊。季中由巴黎聖日門加盟的卡雲尼已經融入球隊,當然小將格連活特也是一個不錯的選擇,但最重要有般奴費南迪斯於中場派牌,整體的戰力便不會走樣。

  作客的韋斯咸陣中最希望擊敗曼聯的一人,當然是領隊莫耶斯啦!想當年莫耶斯從費格遜手上接過教鞭,最終如喪家犬般敗走,更被改了一個莫天才的渾號,聲名從此一落千丈,直至執教韋斯咸,才走出谷底。

  不過錘仔幫今季戰績雖然不俗,但之前面對利物浦、車路士、曼聯都輸波,恐強症依然存在。其中1:3聯賽不敵紅魔鬼之役,更有球證從中作梗。今仗再遇曼聯,又會否被裁判吹死呢?球迷不妨拭目以待。