蘇斯克查想搵師弟救亡

109

  本周日英超將會上演雙紅會(紅魔鬥紅軍),比賽結果被視為蘇斯克查能否保住帥位的關鍵。回顧去季,曼聯聖誕前以1:3不敵利物浦,賽後摩連奴立即被炒。紅軍會否成為連續兩季送魔帥上路的劊子手,全球拭目以待。

  儘管前路未明,但工作仍要繼續。成績咁差,冬季轉會窗再揮金增兵是100%的是。據悉娃娃臉殺手便相中了自己的國家隊師弟,季初一鳴驚人的挪威新星艾寧夏蘭特,但將會面臨西甲班霸皇家馬德里的競爭。

  開鑼之前,效力薩爾斯堡的艾寧夏蘭特寂寂無名,如今已是無人不識,於球會賽事上陣11次轟入18球。球迷可能會認為,艾寧夏蘭特於奧地利聯賽踢波,數據可能有水分喎。不過此子於歐冠也有4球進帳兼上演過帽子戲法,暫時是歐冠分組賽神射手,其潛力實在毋需懷疑。

  蘇斯克查希望換兵止跌的同時,領導層也有換帥止血的打算。據悉,假若曼聯在雙紅會輸波,曼聯便會立即重金撬RB萊比錫領隊尼基斯文過擋。尼基斯文20歲因腳患被逼掛靴,他把心一橫向幕後崗位發展,成功幹出一片天。1987年出生的他,目前只是32歲,是德甲有數以來最年輕的領隊。

  不過白頭沈都係嗰句,搵咩球員咩領隊都好,紅魔鬼的吸引力已遠遜費格遜領軍的黃金時代,人哋唔係一定要買你帳的,斟介之時,千祈唔好仲以為個世界係圍住你曼聯轉至得。