維拉平手盤食住上

150

  除AC米蘭外,歐洲五大聯賽僅餘的另一支長勝軍阿士東維拉,今晚會在英超獨腳戲擺擂台,迎戰升班馬列斯聯。維拉先炒利物浦,再挫李斯特城,愈踢愈有信心,仍有平手盤可揀,有力坐和望贏。

  白頭沈曾經指出,靚仔球星基亞利殊沒有選擇加盟大球會而留在維拉,是最正確兼雙贏的決定,因為他的踢法需要大量控球在腳,而能夠最大幅度發揮其潛力的隊伍,實非維拉莫屬。大家試想想,如果基亞利殊當初轉投了曼聯,勢必步上荷蘭國腳雲迪碧克目前在奧脫福等運到的後塵,試問如果連波都冇得踢,又點可以一展抱負。

  上陣5次取得4入球3助攻,基亞利殊協助維拉聯賽4戰全勝,雖然球隊距離重拾八十年代稱霸歐洲的光輝歲月仍十劃都未有一撇,但無疑已進一步奠定鎮山之寶的地位。白頭沈相信,25歲的基亞利殊身價已超過6000萬鎊,成為英格蘭本土最具價值的球星之一。

  維拉表現咁出色,當然不只是一個人的功勞,披甲7次獲5入球1助攻的土炮射手奧尼屈堅斯,同樣踏上爆紅之路。不過更令白頭沈留下深刻印象的,是英格蘭後衛泰朗明斯,這位身高6呎5吋的巨人踢足5場(包括1場聯賽盃)的每一分鐘比賽,單就季初的表現而言,他絕對更勝國家隊隊友哈利馬古尼(曼聯)及祖高美斯(利物浦),堪稱現時三獅兵團的第一中堅。

  作客的列斯聯所輸兩場都只是僅負一球,實力同樣未見底,但考慮到維拉大勇且具地利下仍毋需讓波,明顯更值博。