白頭沈論波

1355

  英國3月29日脫歐,以當地政壇撕裂問題之嚴重,相信屆時很可能會在無協議下脫歐,亦即所謂的硬脫歐,恐會出現極多難以估計之亂局。白頭沈此欄不講政治,只談足球。脫歐對英超有冇影響?答曰︰後果可以相當嚴重。

  運動本應不涉政治,但政治總會找上門。以英超為例,整個國家離開歐盟,足球當然難以獨善其身。而首當其衝的問題,就是非英籍球員勢會大幅減少。據英格蘭足總建議,英國脫歐後,考慮將現時各隊的外援名額,由17人減少至12人。

  以利物浦為例,目前陣中有16位外籍球員,就算不是刪除穆罕默德沙拿、華基爾雲迪積克及艾利臣比加這些絕對主力,也很有可能要向洛夫雲、祖爾麥迪比或拿比基達開刀,換言之實力必定會受到打擊。而宏觀來看,20隊都要削減外援,亦即宣告英超的水準及吸引力將會全面下降,屆時轉播費、廣告費仲可唔可年年創新高?

  過去20年的英格蘭球員先生,亦即英超最佳球員,外援14人,英國只佔6人(加里夫巴利、朗尼、謝拉特、泰利、堅尼、舒寧咸)。英超幾乎是一個屬於頂級外援的聯賽,如今卻要削減外援,試問點會唔頭痕。不過作為民主國家,既然公投結果是這樣,講過唔算數就更加肉酸兼樹立壞榜樣。距離3月29日仲有1個月多啲,真係唔知點收科矣!