喜鵲遠水難救近火

209

  周日英超兩場賽事,愛華頓與韋斯咸上演黑馬對決,拖肥糖主場出擊毋需讓波,平手盤值得秤先。新晉土豪紐卡素迎戰熱刺,可惜遠水難救近火,縱有地利亦難看好,宜撐熱刺讓平半上盤繼續反彈。

  近期英超最大新聞,非沙特阿拉伯主權基金以3億鎊收購紐卡素莫屬,有指新金主的財富高達3200億鎊,而且只是面嗰浸,勢為球壇掀起翻天巨浪。不過即使喜鵲富可敵國,但明年1月1日轉會窗重啟之前,他們只能以原班人馬捱埋2021年。再者紐卡素目前仍由布魯士領軍,這位庸帥深知自己必遭解僱,不排除會在食無情雞前敷衍領軍。

  還是鵲迷心水清,在網上呼籲紐卡素盡快易帥,否則以目前球隊7戰0勝3和4負排尾二的劣績,再遲一點行動,球壇首富來季隨時要降落英冠,屆時王儲穆罕默德就乜面都冇晒了。外媒估計,干地、羅渣士、謝拉特及林柏特都有機會成為紐卡素新帥,其實以該隊的財力,即時要即時撬走哥迪奧拿(曼城)或高普(利物浦)也非無可能,球迷不妨留意後續發展。

  紐卡素既未開齋在榜末食塵,某程度亦反映出他們的人腳有多差,不會因為易主就突然變身,該隊陣中只得翼鋒辛特麥斯文是可堪造就,其他球員未來或會一個不留。

  作客的熱刺開季3連勝後,因為傷兵困擾隨後5戰不勝,讓新帥紐奴備受批評。不過隨著人手問題逐漸得到紓緩,熱刺近兩仗先後擊敗梅拿及阿士東維拉重返軌道,今晚到訪聖占士公園料可再下一城。